रत्नागिरी : सामाजिक कार्यकर्त्या प्राची शिंदे यांनी रत्नागिरी ग्राहक पेठेअंतर्गत आयोजित केलेल्या महिला बचत गट व उद्योगिनींच्या उत्पादनांच्या दीपावली प्रदर्शनाचे उद्घाटन ज्येष्ठ उद्योजिका शीलावती तावडे यांच्या हस्ते झाले. रत्नागिरीतील साई मंगल कार्यालयात हे प्रदर्शन २२ ऑक्टोबरपर्यंत सुरू राहणार आहे.
नर्सरी उद्योजिका शीलावती तावडे यांनी फीत कापून प्रदर्शनाचे उद्घाटन केले. या वेळी मरीनर दिलीप भाटकर, बांधकाम व्यावसायिक संतोष तावडे आणि जाणीव फाउंडेशनचे महेश गर्दे, प्राची शिंदे आदी उपस्थित होते. शिंदे यांनी सर्व मान्यवरांचे स्वागत रोपटे देऊन केले.
प्राची शिंदे म्हणाल्या, ‘या प्रदर्शनाला उद्योगिनींच्या उत्पादनांना उदंड प्रतिसाद मिळत आहे. किमान ३-४ प्रदर्शनात स्टॉल लावल्यानंतर अनेक महिलांनी दुकान सुरू केले. तरीही त्या अजूनही प्रदर्शनात भाग घेतात.’
मरीनर दिलीप भाटकर म्हणाले, ‘काताळे येथे आमच्या जहाज ब्रेकिंग उद्योगात उद्योगिनींना सुवर्णसंधी आहे. जहाज हे स्वतंत्र जग असते. त्यामुळे ते तोडताना त्यातील असंख्य प्रकारच्या वस्तू विक्रीसाठी पंचतारांकित हॉटेल्समध्ये जातात. या वस्तू आपण येथेच घेऊन त्याची विक्री केल्यास उद्योगिनींना चांगली संधी मिळेल. जहाज दुरुस्ती उद्योगात तरुणी, महिला यश मिळवत आहेत. महिला कणखर असतात. जहाजाच्या स्वयंपाकगृहातील सर्व भांडी, इलेक्ट्रिक शेगडी, इस्त्री अशा असंख्य प्रकारच्या वस्तू घेऊन त्या विकता येतील. जानेवारीपासून हा उद्योग सुरू होणार आहे.’
महेश गर्दे यांनी जाणीव फाउंडेशनचे काम सांगतानाच उद्योगिनींच्या उत्पादनांना मोठी बाजारपेठ मिळवून देण्याकरिता मदत देण्याचे आश्वासन दिले. शीलावती तावडे यांनी प्रोत्साहनपर भाषण केले.
संतोष तावडे यांनी सांगितले, ‘महिला एका उद्योगात स्थिर राहत नाहीत. चार महिला एकत्र येऊन अनेक वर्षे उद्योग वाढवत नेले पाहिजेत. यातून यश मिळत जाते.’
श्रद्धा तेरेदेसाई यांनी सूत्रसंचालन केले. सईदा बाग यांनी मनोगत व्यक्त केले. पहिल्या प्रदर्शनापासून सहभागी झालेल्या उद्योगिनी शुभांगी इंदुलकर यांचा या वेळी सत्कार करण्यात आला. प्रदर्शन २२ तारखेपर्यंत सकाळी ११ ते रात्री नऊ या वेळेत खुले राहणार आहे.
प्रदर्शनात दिवाळी फराळ, रेडिमेड कपडे, दागिने, खाद्यपदार्थ, शोभिवंत व गृहोपयोगी वस्तू असे विविध प्रकारचे ५० स्टॉल्स मांडले आहेत. लायन्स क्लबतर्फे महिलांची मोफत हिमोग्लोबिन व आरोग्य तपासणी, विविध खेळ, सांस्कृतिक कार्यक्रम आयोजित करण्यात आले आहेत.
